ازاى تعرف المجال الانسب ليك عن طريق مهاراتك وقدراتك الشخصية "Skills & Abilities" ؟
لو عندك مشكلة انك مش عارف تحدد ايه المجال "Career" الانسب ليك ومش عايز تشتغل بقية حياتك فى شغلانة انت متبحبهاش, فى خطوات تساعدك تكتشف ايه المجال الانسب ليك وتخرجك من دايرة الحيرة والتوهان دى
واول خطوة عشان تعرف ايه المجال الانسب ليك هى انك تعرف وتكتشف نفسك كويس,
وهنتكلم على ده اكتر فى سلسلة مقالات بداية من انهردة:
اول حاجة لازم تكتشفها فى نفسك هى المهارات والقدرات اللى عندك
"Skills & Abilities" هات ورقة وقلم واكتب كل اللى تكتشفه فى نفسك وللتوضيح:
Skills :
هى المهارات المكتسبة اللى عندك او الحاجات اللى انت شاطر فيها وبتعرف تعملها كويس والناس بتقول عليك انك شاطر فيها او بتوصفك بيها زى مثلا انك بتعرف تكلم قدام الناس او انك بتعرف تخطط كويس او انك بتعرف تشرح اى حاجة ببساطة, اسأل الناس اللى اشتغلت معاهم او صحابك عنها وفكر مع نفسك فيها اكتر.
Abilities :
هى المواهب الفطرية اللى عندك "Talent" الموهبة اللى ربنا ادهالك واتولدت بيها من غير ماتتعلمها او تكتسبها ودى ممكن تكون عندك بس متكنش اشطر حد فيها زى مثلا انك صوتك حلو او عندك موهبة الرسم فا دى حاجات مزروعة فيك من غير ما تتعلمها وبتحتاج تشتغل عليها عشان تبقى احسن فيها.
مثال توضيحى اكتر
معظمنا بيلعب كورة عن طريق انه قعد يتعلم ويجرب فترة كبيرة واحدة واحدة ولكن دايما بنلاقى فى واحد عنده الموهبة وده اللى لما بيشتغل عليها بيتميز
ال Skills & Abilities اللى هتكتشفها فى نفسك هى اللى هتحدد مواصفات المجال او ال Career اللى هيبقى عندك القابلية انك تبقى شاطر ومميز فيه,
مفيش حد ربنا خلقه من غير موهبة اوميزة انت بس محتاج تتعب شوية عشان تعرف تميزك ده فى ايه عشان تستغله صح وتوصل للى انت عايزه
تابعنا فى مقالتنا اللى جاية عشان تعرف ازاى تكتشف نفسك اكتر,
جرب الموضوع بنفسك وقولنا ايه اكتر مهارة او موهبة مميزة اكتشفتها فى نفسك؟
Comments
Post a Comment