ازاى تحصل على الوظيفة اللى بتتمناها وانت معندكش خبرة؟

كتير مننا بيقابل مشكلة انه بيقدم على وظائف كتير لكن معظمها محتاجة خبرة!
وعشان يجيب الخبرة لازم يشتغل والموضوع يبقى دائرة مفرغة.. :)

والمشكلة بتبقى اكبر لو انت حديث التخرج وبتلاقى وظائف مطلوب ليها:
حديثى التخرج + خبرة سنة او اثنين "طيب تيجى ازاى دى؟ :) 

فى حقيقة مشهورة بتقول:
انت مش هتقدر تحصل على وظيفة بدون خبرة!! لكن تقدر تحصل على الخبرة بدون وظيفة!
...................................................................................

فى حاجتين انت بتتقيم عليهم وانت بتقدم على اى وظيفة:

1- potential value "القيمة المتوقعة"بمعنى هل انت ممكن تضيف قيمة للشركة وللوظيفة فى المستقبل ولا لآ؟
وده غالبا بيتقاس عن طريق تقييم "سلوكياتك - مهاراتك - قيمك - حماسك واهتمامك- قابليتك للتعلم والتطور"

2- Career History "تاريخك المهنى"بمعنى هل خبراتك السابقة والمشاريع اللى انت اشتغلت عليها كافية انك تقدر تتحمل مسئوليات المنصب اللى انت مقدم عليه ولا لآ؟

وهنا تقع المشكلة انك معندكش الخبرة المطلوبة!
....................................................................................

4 اساليب تتغلب بيهم على عقبة الخبرة: (y)

1- اكسب مصداقية:واسهل طريقة انك يكون عندك مصداقية فى مجالك انك يكون معاك درجات دراسية متقدمة فى المجال ده, زى انك تحضر دبلومة او تاخد شهادة تميزك فى مجالك او تتمرن على ايد حد من انجح الناس فى المجال ده. وسعتها الناس ممكن تثق فيك!!

2- ابدأ من البداية:لو انت شاطر فى مجالك هتشوف نفسك اعلى من وظائف كتير متاحة قدامك وانك تستاهل الاحسن, بس الحقيقة مفيش حد بيبدأ كبير!!

مش غلط انك تبتدى فى وظيفة صغيرة فى مجالك او قريبة منه فى سبيل انك هتتعلم وهتاخد خبرة من ارض الواقع وبالتفصيل وكمان كل الوقت ده هيتحسب ليك على انه خبرة, 

زى اللى نفسه يشتغل Marketing وبيشتغل Sales لغاية ما يلاقى فرصة كويسة وكمان بياخد خبرة :)

3- استثمر وقتك:الفترة اللى انت بتدور فيها على شغل وبتقابلك فيها عقبة الخبرة, ممكن كمان تستغلها فى انك تشتغل بشكل تطوعى او من غير فلوس فى مجالك عشان تكسب خبرة وتتعلم اكتر, مفيش صاحب عمل ميتمناش انه يشغل حد ببلاش!:)

4- استغل شبكة علاقاتك:اكيد ليك معارف كتير واصحاب واقارب, الناس دى كلها ممكن يكون عندهم فرصة لوظيفة ممكن يرشحوك ليها بس عمرهم ما فكروا انك مهتم بالمجال ده او بتدور على شغل فيه!!

حاول تتواصل مع شبكة علاقاتك وتعرف الناس اهتماماتك ومجال شغلك اللى بتدور على فرصة فيه وازاى انت مميز فى المجال ده وحققت فيه انجازات :) 

ابسط حاجة لو بتعمل share وببتفاعل كتير على حاجات متعلقة بمجالك على وسائل التواصل الاجتماعى زى Facebook & Linkedin ده هيعرف الناس ايه المجال اللى انت مهتم بيه وممكن يرشحوك لاى فرصة عندهم :)

دى 4 اساليب هتخليك تظهر جانب ال potential value بشكل اقوى وهتخليك تبنى جزء ال Career History بتاعك فى وقت اقصر,

من الخبرة اللى هتكتسبها من التطوع او انك تبدأ السلم من اوله او حتى تطور من نفسك وتتعلم حاجة مميزة فى مجالك :)

لو فضلت مركز فى موضوع "الشغل عايز خبرة والخبرة عايزة شغل" عمرك ما هتشتغل!

ابتدى اسعى واتعب عشان تبنى خبرتك بأيدك انت حتى لو معندكش وظيفة حاليا (y)