ازاى تكتب الكورسات ال "Self Study" فى ال CV؟
ازاى تكتب الكورسات ال "Self Study" اللى ذاكرتها مع نفسك فى ال C.V وتعرضها بشكل مميز يعلى من قيمتها ؟
خلينا نتفق ان التعليم الذاتى Self Study هو من افضل الوسائل لاى حد بيحاول يتعلم او يطور من نفسه ومعهوش فلوس لكورسات او شهادات كبيرة
وفكرة التعليم اونلاين انتشرت فى العالم كله حاليا تحت مسمى MOOC
Massive Open Online Courses
واللى بدات فيها جامعات كبيرة بنشر كورسات اونلاين ليها وببلاش لكل الناس واشهر المواقع اللى بتطبق الفكرة دى
Coursera.org
Udemy.com
Alison.com
ولو عايز تعرف اكتر عن ال MOOC وايه الفرص المتاحة فيه اشترك فى الجرووب ده هيفيدك
MOOCs in Egypt
المشكلة بقى لما اخد كورس اونلاين او اذاكره مع نفسى اكتبه ازاى فى ال C.V ؟
خلينا نتفق ان احنا بلد شهادات وبننبهر اكتر بالشخص لو هو درس فى الجامعة الامريكية مثلا او برا مصر وان فى ناس كتير مبتعترفش بفكرة ال Self Study ومبتقدرش اهميتها ودى حاجة وحشة للاسف بس هنستغلها لمصلحتنا
1- لو انت بتاخد كورس من جامعة كبير زى اللى على Coursera مثلا فا يفضل تكتب اسم الكورس او المادة الاول على الشمال,
ثم اسم الجامعة اللى خدت الكورس منها عشان تبهرهم ويفتكروا انك جامد وكده
وبعدين المدة من واللى لو الكورس طويل او الشهر والسنة على طول ويعدها بقى ممكن تذكر انه Online Course عشان الحسد
واسم الموقعوممكن تكتب نبذة عن محتوى الكورس فى سطرين.
2- لو انت درست الكورس ده على ايد شخص مهم ومشهور زى اللى على Udemy مثلا سعتها ممكن تكتب اسم الكورس او المادة ثم جمبها تقول Delivered By اسم الشخص,
وتكتب نبذة عنه وعن خبراته عشان تعرف الناس اهميته وتذكر المحتوى والمدة
3- ثالثا بقى لو انت قريت كتاب او ذاكرت Materials معينة مع نفسك هيبقى تأثيرها الاقوى فى ال Interview مش فى ال C.V,
بس لو معندكش غيرها حليا ممكن تكتب اسم الكتاب او المادة اللى ذكرتها وتكتب جمبها انك ذاكرتها Self Study واكتب تحتها سطر او اتنين تعريف بالكتاب او ال Material
اكتر 3 حاجات ممكن يعظموا قيمة العلم اللى اتعلمته هم "المكان-الشخص اللى درسلك - قوة وندرة المحتوى "
اخيرا ومن تجربة شخصية اكتر حاجة فادتنى هى التعليم اونلاين لانه ببلاش اولا وعلى ايد احسن ناس ومن افضل الاماكن ومتاح وانا قاعد فى بيتنا
الشهادات مش كل حاجة خليك فاهم مش حافظ واتعلم Online
Comments
Post a Comment