10 اخطاء شائعة هتخليك تفشل فى اى Interview, حاول تتجنبها

خلال شغلى فى ال HR الفترة اللى فاتت عملت عدد كبير جداااا من ال Interviews وشفت اخطاء كبيرة جداا معظم الناس بتعملها وبتخلى اى حد يستبعدهم من فرصة التعيين ,

وكنت بحاول دايما اتكلم عن الاخطاء دى فى اى session بنعملها فى Super Talent بس قلت اكتبها فى مقال مجمع عشان يفيد عدد اكبر :)

اكثر اخطاء شائعة فى ال Interviews وازاى تتجنبها :

1- اول غلطة انك تروح اى Interview وانت مش محضر معلومات عن الشركة او المكان اللى عايز تشتغل فيه لان اول سؤال تقريبا تعرف ايه عننا ؟ فا حاول تذاكر الشركة كويس واسهل حاجة هو ال Website بتاعهم

2- انك تجاوب سؤال Introduce Yourself او Tell me more about yourself ؟ بأجابات تحتوى على معلومات شخصية ملهاش اى لازمة ومتظهركش كأحسن حد للوظيفة زى سنك - متجوز ولا عازب - عندك كام اخ - ساكن فين بالتفصيل - الخ

السؤال ده هو الفرصة اللى ممكن تكتسبك بقية ال Interview :)
اعرف ازاى ممكن تستغله صح من المقال ده : http://bit.ly/3interviewq

3- انك متكنش عارف ايه الموجود فى ال C.V بتاعتك او انت كاتب ايه بالظبط او ترتيبها لان ده ببساطة بيدل على انك مش عارف نفسك كويس ومش منظم فا حاول تذاكر ال C.V بتاعتك كويس قبل اى Interview

4- انك متكنش عارف انت جاى ليه او عايز تشتغل ليه فى الشركة دى والوظيفة دى بالتحديد ؟
وده بالنسبالى السؤال الاهم لان لو انت مش هتعرف تجاوبه يبقى مستاهلش الوظيفة , فا حاول تحضر نفسك لسؤال زى ده اشمعنا الشركة دى والوظيفة دى ؟

5- ودى طريقة تانية من نفس السؤال اللى فات انى اسألك عن طموحك او هدفك او يعنى زى ما بتسمعوا ايه ال Career Objective بتاعك ؟
وده السؤال اللى بيترفض بسببه معظم الناس :)
لانهم بيجاوبوه ب 3 طرق غلط
- معرفش او لسة هحدد او اى حاجة عامة ومش محددة
- يقولك هدف كبير اوى بس تيجى تسأله هتوصله ازاى او ناوى تعمل ايه تسمع اى كلام او يقولك هسعى واشد حيلى
- يقولك هدف كويس وخطة عشان يحقق الهدف ده بس عمره ما ذكر ازاى الوظيفة اللى هو مقدم عليها او شغله فى الشركة دى هيساهم فى تحقيق هدفه.

6- انك تجاوب الاسئلة اللى بتتسألك وانت مش باصص لل HR او الشخص اللى بيعملك ال Interview وده هيضايقه طبعا وهيحسسه انك بتكدب فا حاول تحافظ على Eye Contact مهما كان عدد اللى بيعملك interview

7- متسألش اسئلة تضيع الدنيا زى ؟
- هو المرتب كام ؟
- الاجازات قد ايه ؟
- عندكوا Break ولا لآ , لان كل الكلام ده هتعرفه لو اتقبلت :)

8- متحاولش تتكلم او ترغى كتير جداا اكتر من الشخص اللى بيسألك واياك تقاطعه تماما لان اى حاجة هضايقه بيها مش فى صالحك خالص لان عندنا كتير من ال HR فى مصر بيشيلوا فى نفسهم من الحاجات دى :)

9- اياك متكنش محضر قبل اى Interview وعندك دليل يثبت كل ميزة او موهبة عندك وقصدى هنا بدليل موقع تحكيه تثبت بيه انك شاطر فى حاجة معينة او عندك مهارة معينة مش معنى كده الاقى حد داخل ال Interview بدوسيه شهاداته من ابتدائى لحد ما تخرج زى ما بيحصل معايا :)

وبالمناسبة الشهادات مش مهمة لو انت مش فاهم ومش عارف حاجة عن الشغل "ولو انت فاهم من غير شهادات صدقنى هحترمك اكتر "

10- اخيرا انا متكلمتش على انك تلبس كويس وتسرح شعرك وتوصل قبل ميعادك وتبتسم وتسلم سلام رجالة والكلام ده عشان دى حاجات اساسية المفروض حضرتك تبقى عارفها :)

عذرا على الاطالة لو عندك اى سؤال عن ال Interview ممكن تكتبه فى تعليق وان شاء الله نقدر نفيدك :)

هذا المقال بناء على طلب ناس كتير من ال Fans بتوعنا لو عندك اى اقتراحات لمواضيع معينه عايزنا نتكلم عنها وتتعلق بأزاى تميز نفسك فى سوق العمل ابعتلنا فى رسالة :)